انا اتأخرت معلش
معاكم 3 حلقات والاخيرة جااااااي
الحلقة السادسة
وفي المحل جلس المعلم العنتبلي يخمِّن ما هو الخبر الحلو التي ستخبره به زوجته عندما يعود وكالعادة أخذ يحدِّث نفسه
العنتبلي:قال خبر حلو قال؟! خبرك اسود ومنيل هو من إمتى انتي ولا حد في البيت بيجيبلي خبر حلو؟!
بس من صوتها تحس إنها واثقة من نفسها كده مش زي كل مرة ياترى فيه إيه؟! تكونشي الولية دي حبلت تاني؟! يا نهار زي بعضه! ده إحنا عندنا لغاية دلوقتي 5 عيال! هو أنا متجوز أرنبة يا جدعان؟!
أحد العاملين : أرنبة إيه يا معلم دي جاموسة!
قطع عليه أحد العاملين في المحل شروده بهذه الجملة فاستشاط العنتبلي غضباً عليه
العنتبلي: يا نهار أبوك زي وشك!! جاموسة إيه يا بقرة انت؟! انت اتجننت ياد؟!!
العامل:مالك يا معلم؟! ماهي فعلاً جاموسة وبنت جاموسة كمان!
لم يمهله العنتبلي أكثر من هذا ورفع كفه الغليظ وصفع العامل الغلبان على وجهه صفعة قوية ارتطمت رأسه على إثرها بالحائط القريب فسقط مضرخاً في دماءه وهو يصرخ بينما اجتمع حولهما الجميع في دهشة وحيرة
أحد العاملين:هو في إيه يا معلم؟! الواد ده عمل إيه؟!
العنتبلي (وهو مايزال غاضباً ثائراً): بيقول على مراتي جاموسة وبنت جاموسة كمان!
ثم وجه كلامه للعامل المسكين وهو يقول:بقى أنا متجوز جاموسة؟!
العامل (المسكين):يا معلم أنا مالي ومال مراتك بس! أنا بتكلم عالعجل إلي وصل دلوقتي! كنت جاي أقولك إنها جاموسة!
العنتبلي (في ذهول): العِجْل؟!!!!
ثم أدرك سوء فعلته والعاملين يسندون العامل المضروب ويحاولون منع الدماء وفعل الازم فأخذ العنتبلي يضرب كف على كف
وهو يقول :أما أنا طلعت بقرة صحيح!!!!!
طب قوم يابني روح المستشفى عشان يعملوا اللازم وحقك علي وآدي راسك أبوسها!
العامل:خلاص يا معلم حصل خير! العِجْل قدامك أهو استلمه انت واعمل اللازم!
العنتبلي: ما تحملشي همّ انت خد الواد كرشة وروحوا للمستشفى عشان يعملوا اللازم!
ذهب العامل المضروب مع كرشة! وخرج المعلم العنتبلي ليستلم الجاموسة وهو مايزال يفكر في الخبر الحلو المنتظر!
-----------
الحلقة السابعة
عاد المعلم عنتبلي إلى البيت مسرعاً وعندما شم رائحة الطعام وشاهد
بعضه على الترابيزة لم يشغله عنه أي شيء!
وأثناء الأكل بدأت الأم بالكلام!
الأم: بقولك إيه يا معلم بنتك جايلها عريس!
حلاوة العنتبلي(بدون أن يلتفت لها):عريس؟! وده جاي منين ده لأخر!
تبادلت الأم نظرة سريعة مع بنتها قبل أن تقول
الأم:من النت!
العنتبلي: النت؟! النت تاني؟! هو النت ماله عمّال يحدِّف عرسان اليومين دول؟!
ضحكت عفاف بينما ردت الأم
الأم:يحدِّف عرسان إيه يا راجل انت! هو إنت تكره إنه عفاف يجيلها عريس؟!
العنتبلي:لا طبعاً لكن اشمعنى الزفت الي اسمه النت ده ! هو مافيش جواز دلوقتي إلا بالنت؟!
عفاف: ده المستقبل يا بابا!
العنتبلي:المستقبل؟! طب والمستقبل المرة دي نظامه إيه يا بتاعة النت؟!
عفاف: زي الماضي بالضبط يا بابا! مافيش جديد!
العنتبلي(وهو يواصل الأكل): يعني إيه؟ مش فاهم
الأم: يعني هو نفس العريس بتاع المرة اللي فاتت!
العنتبلي:هو الواد ده لسة ما انهدش؟!
الأم:يا راجل ينهد إيه هو عمارة؟! الراجل متمسك ببنتك وعاوز ييجي يتقدم لها تاني
العنتبلي: وأنا مش موافق! ومش عاوز أشوف خلقته تاني!
عفاف: ليه بس يا بابا؟! ده المرة دي هييجي ومعاه أهله!
العنتبلي: إن شاء لله يجيب حسني مبارك نفسه!! برضه لأ ! هو لسة فاكر؟! ده الموضوع ده بقاله شهور! معقولة ده كله بيقنع أهله إنهم ييجوا! ماعنهم ماجم!
الأم(وهي تناوله قطعة لحم كبيرة!): يا راجل هدِّي نفسك بس وكُل الحتة دي!
عفاف: يابابا وفيها إيه بس؟ المهم إنهم إقتنعوا وهيجيبهم معاه زي ما حضرتك طلبت منه
العنتبلي(وهو يقطم قطعة كبيرة من اللحم! ):وهما برضه زيه كده من النت يعني؟!
عفاف: أكيد يا بابا!
العنتبلي: وياترى هييجوا راكبين إيه؟ دي إس إل؟!
عفاف(بدهشة): أللالالا!!! إيه ده يا بابا؟! انت عرفت الدي إس إل؟! لالالالا ده إحنا إتقدمنا خالص وكمان شوية مش هنعرف نكلمك!
العنتبلي(ضاحكاً):ما هو أصل أنا جبت قمبيوطر! في المحل بتاعي وجبت واحد يشتغل عليه ووصلنا النت كمان عشان نعرف أسعار السوق إيه وأخبار الإقتصاد إيه والدنيا ماشية إزاي؟
عفاف: ماشاء الله يا بابا! يعني ما قلتليش يعني؟!
العنتبلي: جايز ما جاتشي مناسبة ! وبعدين انا لسة جايبه من 4 أيام بس
بس حقيقي البتاع ده مفيد قوي والواد الي شغال عليه جايبلي أخبار السياسة أول بأول!
عفاف: بجد يا بابا؟! يبقى كده الموضوع سهل خالص والعريس بتاع النت ده أصبح مقبول عن الأول!
العنتبلي(وهو مايزال يأكل في اللحم!):يابت إنتي مالك مدلوقة عليه قوي كده؟!
لأ !!! النظام ده ماينفعنيش يا بنت العنتبلي ! لازم هو الي يندلق عليكِ
الأم: ياراجل ماهو مدلوق على آخره أهو وعاوز يتقدم تاني!
العنتبلي: وأنا مش مرتاحله ولا عاوز أشوف خلقته تاني! يروح يندلق في حتة تانية إن شاء لله يندلق في أقرب بلاعة!!!
من الآخر كده الواد ده مش نازلي من زور!
الأم: وهو يعني كان حبة طماطم عشان ينزلك من زور؟! يا راجل المهم إنه يعجب بنتك ويكون جاهز وقادر إنه يعيشها عيشة حلوة!
العنتبلي:ماهو عشان كده بقول مش موافق! لأنه شكله كده واد هايف من شبان اليومين دول!
عفاف: يا بابا الأستاذ حاتم شغال في شركة كمبيوتر محترمة رغم إنه لسه في الكلية وفاضله شهور قليلة ويتخرج من الكلية إلا إنه شغال في شركة محترمة وعنده شقة ووالده ميسور يعني يُعتبر جاهز وهو عاوز يتقدم بحيث لما يتخرج يكون خاطبني
العنتبلي: ولو! أنا برضه مش شايف فيه أي ميزة! وأنا اللي كنت برسم وأخطط إني أجوزك جوازة سُقع كده!
الأم: سُقع إزاي يا معلم؟!
العنتبلي: كنت عاوز أجوزها من الواد كرشة إبن المعلم البنهاوي!
عفاف(بدهشة وسخرية): كرشة؟!!!! يا بابا حد قالك إني جعانة؟!
ضحك المعلم العنتبلي
وهو يقول : جعانة مش جعانة أهو هيشبعك ويملاكِ وينفخك لغاية ما تبقي زي البلونة وتنفجري ونخلص منك!
عفاف: متشكرة يا بابا عالشعور الجميل ده !
العنتبلي(مبتسماً):يابنت ما تزعليش انا بضحك معاكِ طيب خدي مني حتة اللحمة دي!
عفاف: لأ متشكرة نفسي مسدودة !
العنتبلي(ساخراً): يابت خدي ما تفضحنيش ده أنا سارقها من أمك!
الأم: بقى كده؟! وأنا اقول فين اللحمة الي كانت قدامي! أتاريك أكلت نصها وبتعزم بالنص التاني على بنتك! ياراجل عيب عليك!
العنتبلي: عيب عليا إني عاوزك تخسِّي شوية يا ولية إنتي؟! ما كفاية أكل بقى وقومي هاتي الشاي!
ثم إلتفت إلى إبنته عفاف قائلاً : بصي يا بنتي أنا عن نفسي ماعنديش مانع أقابله تاني! بس يكون في معلومك لو جوازتك منه ما نفعتشي لأي سبب فاعملي
حسابك عالكرشة!
ثم أكمل ضاحكاً ساخراً
أهو على الأقل مش هيدخل بيتنا لأنه تخين قوي ومش بيعرف يخش من الباب! وكمان ممكن ينفع لو عِجل إتأخر عن معاده ولا حاجة هو ممكن يسد مكانه!
ضحكت عفاف لتعبير والدها وهي تقول
ربنا يطمّنك!
---------
مقابلة اهل العريس
الحلقة الثامنة
المعلم العنتبلي: خلاص يا بنت قوليله يجيب امه وابوه ويشرفوا يوم الجمعة بعد العصر
عفاف :متشكرة اوي يا بابا حقولو دلوقتي حالا وركضت الى غرفتها فرحة
*********************************************
النهادرة يوم الجمعة وحاتم واهله حيشرفوا بيت المعلم العنتبلي
دق الباب وركضت عفاف لتفتح
فصرخ المعلم العنتبلي بغضب : خوشي جوه يابنت انتي احسن افعصك برجلي...
بنات اخر زمن حيموتوا على جواز
فتح المعلم الباب ليجد السيد حاتم مع ابوه وحرمة كده حاطة منخيرها في السما وملونه وشها زي عروسة المولد وجميلة جدا وشعرها قصته اخر موضة وحاطة برفان يدوخ بلد
نظر اليها نظرة غريبة
وخاطب حاتم : اومال امك فين !! ماجتشي ليه ؟؟ لسه مش راضيه تقتنع ولا ايه؟؟
حاتم : اقتنعت يا معلم و مامتي ايه قدامك!!!
المعلم العنتبلي بدهشة : دي امك افتكرتها اختك الصغيرة تعرف يا واد عليك حتته ام تخبل!!!
ام حاتم : اهلا يافندم متشكرة جدا على زوقك
اصل ام حاتم يابنات من اللي بتفضل قدام المرايه عشر ساعات وكل فلوس جوزها رايحة على جلسات المساج وكريمات التجاعيد والترطيب والحاجة دي
المعلم العنتبلي : شرفتونا يا جماعة
وتدخل ام عفاف: اهلا وسهلا نورتوا يا حبايب
واخذت تبوس في ام حاتم حتى كادت المسكينة تختنق وتفطس بين ايديها
تقعد شوية وتقوم تبوسها تاني وهي بتقول: ايه الجمال والحلاوة دي يا ختي بسبوسة بالقشطة يا عالم
المعلم العنتبلي : احم احم ندخل في الموضوع يا جماعة
ابو حاتم : يا سيد العنتبلي احنا جايين النهاردة نطلب ايدك بنت المصون لابننا حاتم
ام عفاف بفرحة : ده يوم المنى
نظر اليها المعلم نظرة متوحشة: قومي يا وليه جيبيلنا جاحة نشربها
ظل المعلم العنتبلي يرمق ام حاتم بنظرات مفعمة بالدفء والاعجاب
اما ام حاتم فكانت متضايقة جدا وبتقول في نفسها :منك لله يا حاتم خلتي جحش
ولا يسوى اسمه العنتبلي يبصبص لي بس وحياتك لأبوز الجوازة دي
تحرم علي جلسات المساج ووضع الروج لو اللي اسمها عفاف دخلت بيتك
اخذ والد حاتم يتكلم عن امور الجواز وعن الشقة التي يملكها ابنه وانه يعمل في شركة محترمة جدا وانه هيتخرج قريبا يعني بالبلدي ابنه عريس لقطة وما يتفوتش
اما المعلم العنتبلي فكان في عالم تاني خالص سارح في ملكوت الله :ايووه يا جدعان ادي النسوان ولا بلاش حاجة تشرح القلب الحزين
يااااااه انا اكتشفت بعد ما شوفت ام حاتم الزفت اني كنت واخذ مقلب جامد ومتجوز جاموسة مش حرمة
يا سلام على رحيتها اللي بتهفهف وبتطري القلب اما اللي عندي ريحتها ما تفرقش عن ريحة عمال سوق العجول
وتدخل عفاف بحياء رفقة والدتها تحمل صينية الشربات والتقت عيونها بحاتم الذي ابتسم : اهلا انسة عفاف ازيك؟؟
عفاف : تمام يا استاذ حاتم
حاتم : ماما اهي دي عفاف اللي حكت لم عنها
ام حاتم باستعلاء :هلو هو أر يو ؟؟
عفاف :الحمد لله متشكرة يا طنط
اما المعلم العنتبلي ففتح فمه منبهرا ايوووووووووووه يا حلاوتك بالانجليزي
لاحظت ام عفاف نظرات المعلم الى الولية ام حاتم وقعدت تغلي من الغيرة والحسد واللي زاد جنونها ان الوليه قمر وحلوة اووووووي
الى اللقاء مع الحلقة الاخيرة
__________________ أنا من عرفني تصاب نفسه بالغرور والخيلاء ... ويكفيه فخراً أنه يعرفني ... لذلك ... يقف لي انحناء ... |