|
|---|
|
| الإبلاغ عن روابط لا تعمل أضغـط هنــا |
 |
| | LinkBack | أدوات الموضوع | طرق مشاهدة الموضوع |
06-16-2008, 04:27 PM
| #17 (permalink) |
| عضو فعال   |        الحلقة الثالثة رن جرس الشقة مرة واحدة فأسرعت عفاف لفتح الباب ولكن والدها أوقفها وأخبرها أن تلزم غرفتها حتى ينادى عليها ثم فتح هو الباب ليجد شابا وسيما أنيقا ذو رائحة طيبة وإبتسامة هادئة وبيده كيس موز!!! استبشر حلاوة العنتبلى خيرا ودعاه للدخول ولكنه أخذ ينظر وراءه فى تعجب لعدم وجود أحد معه فأغلق الباب خلفه فى عنف وتغيرت ملامح وجهه وهو يقول ! أهلا! حاتم: أهلا بيك يا عمى العنتبلى: خير يابنى؟! حاتم(فى قلق): هى الآنسة عفاف ما قالتلقوش إنى جاى؟! العنتبلى: لا قالتلنا بس ماقالتلناش إنك سيادتك هتشرّف لوحدك! حاتم: لا ياعمى منا مش جاى لوحدى أنا معايا كيس موز! العنتبلى: لا يا شيخ! كيس موز! الأم: ياما جاب الغراب لأمه! حاتم: طيب يا عمى ندخل فى المفيد! العنتبلى: ندخل فى المفيد! إنت متأكد إنك جاى تدخل فى المفيد؟! حاتم: أكيد يا عمى إمال أنا جاى ليه؟! العنتبلى: وإن شاء الله هندخل فى المفيد بطولك كدة؟! من غير والدك ولا والدتك ولا عمك ولا خالك ولا أى حد! حاتم: لا لا يا عمى ماهو انتوا هتشوفوهم فى الفرح إن شاء الله وقف العنتبلى مرة واحدة صارخا نعم يا خويا؟!!! فى الفرح؟! حاتم: اتفضل بس يا عمى وأنا أفهمك على كل حاجة العنتبلى: أدينا اتفضلنا أهو نعم؟! أنا ياعمى اسمى حاتم وعندى 22 سنة و3 أشهر و5 أيام و4ساعات ونصف!!!! الأم(بحدة): جرا إيه يابنى إنت؟! كان زمانك إتجوزت وخلفت كمان! العنتبلى: استنى بس يا أم عفاف إما نشوف أخرتها! حاتم: أنا يا عمى عندى شقة واسعة والحمد لله وجاهزة عالفرش العنتبلى: الى بعده! حاتم: وجاى أطلب إيد الآنسة عفاف طبعا أنا عارف إنكم مستغربين إنى جيت لوحدى العنتبلى: الله ينور عليك هو دة بقى المفيد! فين الحاج والحاجة؟! حاتم: بصراحة كدة ياعمى الحاج والحاجة مش مقنتعين بحكاية جوازى من النت دى العنتبلى: نعم يا حبيبى؟! هو مين الى من النت إنت ولا إحنا؟! حاتم: إحنا الإثنين يا عمى! العنتبلى: يابنى انت هتلخبطنى ليه بقى؟! أنا جزار مش صحفى! حاتم: وفيها إيه يا عمى طيب ما أنا طالب مش صحفى! العنتبلى(صارخا): مش صحفى؟!! وكمان طالب!!!! الأم: أومال إنت فاكر إيه يا حاج ماهو طالب فى البتاعة دى الى بيشتغلوا فيها على الكبورر! العنتبلى: خشي يا ولية نادي على عفاف! أتت عفاف بسرعة ووالدها يرمقها بغضب بينما ابتسم حاتم وهو يقول أهلا يا آنسة عفاف عفاف: أهلا بيك يا أستاذ حاتم! العنتبلى: اقعدى يا عفاف شوفى المصيبة دى!!!! عفاف: مصيبة إيه بس يا بابا كفا الله الشر العنتبلى: البيه بيقولى إنه طالب! عفاف: أيوة يا بابا ماهو طالب فى هندسة الحاسبات فى آخر سنة العنتبلى: نعم ياختى؟! أنا كنت فاكره صحفى حاتم: صحفى؟!بس أنا عمرى ماكنت صحفى ولا هكون! عفاف: استنى بس يا حاتم لو سمحت يظهر إن فى سوء تفاهم وفاكرينك صحفى عشان أنا قلتلهم إنك بتكتب فى المنتديات ثم إلتفتت إلى والدها وهى تقول يا بابا الأستاذ حاتم بيكتب عالنت مش فى الصحافة! وكتاباته مميزة جدا العنتبلى: منا عارف إنه بيكتب فى الجرنال وبعدين يدخل الجرنال فى الشاشة عشان الناس تشوفه عالنت انتوا فاكرينى جاهل ولا إيه؟! حاتم: لا ياعمى العفو! عفاف: يابابا فى جرنال فى الدنيا بيدخل فى الشاشة؟! مين اللى قالك كدة؟! العنتبلى: واحد صاحبى متعلم ومتنور ومعاه تالتة إبتدائى! قالي إن الأخبار الى بتشوفوها عالنت عبارة عن جرايد بيدخلوها من فتحات الشاشة اللى ورا!!! عفاف: تالتة إبتدائى؟! يا بابا الكلام ده غلط ومافيش جرايد بتدخل من الشاشة ولا حاجة بالنسبة للأخبار دى عبارة عن كلام مطبوع عالنت العنتبلى: شوفى يا بنتى إنتى وهو لو فضلتم سنة تتكلموا عن النت دة مش هفهم برضه! المهم دلوقتى بسلامته والدك مش موافق ليه؟! إحنا مش قد المقام ولا يعنى ما نشبهشى؟! حاتم: لا ياعمى العفو ده شرف ليهم إنهم يناسبوا حضرتك وطنط! الأم: طنط؟!!! طنط مين يا ضنايا؟!!!! عفاف: اهدي يا ماما هو يقصد إنه يحترمك مش أكتر! حاتم: أيوه طبعا زى ما قالت عفاف كدة بالضبط الأم: بس معلشي يابنى لا طنط ولا مدموزيل قولي يا حاجّة أحسن! حاتم: حاضر يا حاجّة! العنتبلى: طيب لما هو شرف ليهم مش موافقين ليه؟! عفاف: هو يقصد يا بابا إنهم مش موافقين على الطريقة نفسها يعنى الزواج عن طريق النت العنتبلى: طب ليه يا بنتى مش ده جواز على سنة الله ورسوله؟ حاتم: أكيد يا عمى بس تقول إيه بقى ربنا يهديهم! العنتبلى: طب ممكن تقولى بقى إزاى عجبتك بنتى من غير ما تشوفها يعنى إنت أصلا جاي بناءا على إيه؟! نظر حاتم إلى عفاف وهو يقول حاتم:عجبتنى مشاركاتها يا عمى ! مواضيعها وردودها قابلتها أول مرة فى موضوع عن السجاير! كلامها لفت نظرى ولقيتها مرة واحدة مشاركة فى موضوع ليا عن الكورة وأقنعتنى بكلامها إن الكورة دى للفاضيين ومش ممكن واحد مسلم يشعر بإخوانه فى العراق وفلسطين يقعد يكتب موضوع عن الكورة ويشجع الأهلي! العنتبلى: اخص عليكى يا عفاف ! خلتيه يشجع الزمالك بدل الأهلي؟! حاتم: لا ياعمى هى خليتنى أسيب الكورة نهائى وأشجع الوحدة الإسلامية!بعد ما إقتنعت بكلامها طلبت من الموديراتور إنه يقفل الموضوع! و... قاطعه العنتبلى: طلبت من مين يا خويا؟! حاتم: الموديراتور! العنتبلى: ويطلع إيه الموتور ده كمان ؟!!!! عفاف: يقصد المشرف يا بابا يعني الى بينظّم المكان العنتبلى : طيب! حاتم: المهم بدأت أعجب بيها وأتابع مشاركاتها ومشيت وراها فى كل موضوع تروحه! خرجت من ساحة الشباب للمنتدى السياسى خرجت وراها لقيتها شاركت فى موضوع عن بوش وشارون شاركت معاها وشكرتها على مشاركتها ونسيت أشكر صاحب الموضوع الأصلى! رغم انها أصلا كانت داخلة تشكره فشكلي كان نيله ساعتها! ولقيتها سابت السياسة وراحت لروضة الأخوات فى موضوع تعارف وأنا كنت ماشى وراها كالمسحور فشاركت بعد مشاركتها على طول رغم إن الموضوع للأخوات فقط ومأخذتش بالي إلا لما المشرف وقفني! وعلى ما سجلت بإسم جديد مؤقتا لقيتها فى المنتدى العام بتشارك فى موضوع للنكت فقلت فرصة أكتبلها نكتتين يضحكوها قبل ما تشارك هي وفعلا كتبت نكت جامدة قوى وقلت أكيد هتضحك لقيتها كاتبة عتاب طويل عريض لصاحب الموضوع إن النكت دى ما يصحش تتقال فى منتدى إسلامى وبتنصحه إنه يشيل الموضوع ويراجع نيته!!! لقيتها دخلت موضوع شمس وقمر قلت أهو فرصة نلعب سوا! فدخلت قلت شمس قبل ما هى تقول قمر واستنيتها كتير تقول قمر بدون فايدة فقلت لنفسى معقولة ده كله بتكتب ثلاث حروف؟! ولا يمكن بترسملهم القمر ذات نفسه ! المهم بعد 5 دقائق لقيتها رازعة صاحب الموضوع كلمتين عن المشاركات الهادفة والجد ومراعاة ظروف المسلمين المعتقلين والمعذبين والمقتولين لغاية ما نفسى غمت عليا! فسحبت كلمة شمس وكتبت بدالها تحيا الوحدة الإسلامية! وقلت البنت دي لازم تبقى من نصيبى لأنها إيجابية جدا ومحترمة جدا فطلبت إيميلها من المشرف قالي ممنوع! حاولت ان أقنعه وقلتله ياعم يرضيك يرضيك مافيش فايدة!!! طبعا الأب والأم قاعدين مفنجلين ومش فاهمين أى حاجة ويستمعون لحاتم ويومئون برؤوسهم كأنهم يفهمون! ولكن عفاف كانت تبتسم وقالت أومال عرفت إيميلى إزاى؟! حاتم: قدرا! لقيتك كاتباه لواحدة صحبتك فأخذته على طول! الأب: إحنا إن شاء الله مش هنخلص النهارده؟! حاتم: أنا آسف يا عمى حضرتك موافق طبعا؟! الأم: يوافق على إيه يا جدع إنت هو سلق بيض! الأب: انت عاوزنى أوافق على إيه هو انت قلت حاجة أوافق عليها؟! حاتم: طبعا ياعمى على عرضي للزواج من كريمتكم عفاف! الأب: انت فاكر اننا هنقبلك كده بطولك؟! من غير ما والدك ووالدتك يوافقوا و نتفاهم عالتفاصيل! حاتم: وفيها إيه ياعمى بس هو مش أنا الى هتجوز ولا هما؟! الأب(وقد فاض به الكيل): اسمع ياواد إنت! بقى أنا صابر عليك من الصبح وإنت عمّال تحكيلى قصة حياتك كأنك صلاح الدين! وبعدين عمّال تقولى كنت بجري ورا البنت عالنت من موضوع لموضوع لغاية ما قطعت نفسي وجت اتقدمتلها! نيجى بقى للمفيد إذا كنت فاكر إنك هتضحك علينا بالخمسة كيلو موز دول فأنت غلطان ده أنا ممكن أزحلقك بيهم دلوقتى !!! لو عاوز تخطب عفاف فعلا هاتلي أبوك وأمك عشان نتفاهم غير كده قضيها مواضيع عالنت أحسلك!!! أما عفاف فأهي قاعدة معانا أهي بتاكل وبتشرب ولو ما نفعتشي فى الجواز ممكن ندبحها عالعيد مافيش أى مشاكل!!!!!!!!!!!!!!!!! عفاف: يا بابا بس قاطعها العنتبلى اخرسى يا بنت إنتى وخشى جوه ! حاتم: ماهو ياعمى أنا كنت ناوى قاطعه العنتبلى بدوره ناوى إيه بقى؟! بقالك نص ساعة ناوى ؟! على ما تعمل حاجة هيكون اليوم خلص أنا خلصت إللى عندى روح شاور أهلك والمرة الجاية لو فيه يعنى هاتهم معاك ! حاتم: طب يا عمى ممكن قاطعه العنتبلى مرة أخرى بقولك إيه؟! فى جاموسة هنروح ندبحها كمان شوية لو أخرتنى ممكن أدبحك مكانها !!!! حاتم(مذعورا): لا يا عمى على إيه سلام عليكم! العنتبلى: وعليكم السلام يا سى طالب أفندى! قال عريس من النت قال!!! شوية شوية تجيبيلى عريس من الإنترنت!!!!! يا حرام يا معلم العنتبلي فاكر ان الانترنت حاجة تانية غير النت هههههههه ترقبوا الحلقة الجديدة........
|
|  |
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| طرق مشاهدة الموضوع | |
|
|
العرض العادي
