| التسجيل | التعليمات | قائمه الاعضاء | التقويم | البحث | مشاركات اليوم | اجعل كافة المشاركات مقروءة |
| ||||||||
| ||||||||
| |||||||
| الإبلاغ عن روابط لا تعمل أضغـط هنــا | لكى تصبح مشرفا فى المنتدى اضغط هنا | راديو نجوم FM أضغط هنـا |
 |
| | LinkBack | أدوات الموضوع | طرق مشاهدة الموضوع |
06-10-2008, 04:03 PM
| ||||
| ||||
 مسلسل عريس من النت !!! الحلقة الاولى تركت عفاف الكمبيوتر التي تقضي عليه معظم وقتها فجأة وصرخت بصوت عالي مااااما يا مااااااااااااااااااماااااااااااااااا الأم:إيه يابت؟ بالرَّاحة إخواتك نايمين! عفاف:معلشي يا ماما أصلي فرحانة ...فرحانة قوي الأم: خير يا بنتي فرحيني ربنا يفرح قلبك عفاف: عريس يا ماما عريس!!!! الأم(فرحة): يا ألف نهار أبيض يا ألف نهار مبروك لولولولولولولولولولولولولولوييييييييييييييي ! وبعد دقيقتين من الأحضان والقبلات تذكرت الأم! الأم: ألا قوليلي يابت عريس مين ده الي هيتقدملك وماقلتليش من ساعة ما جيتي من الجامعة ليه؟ عفاف: لأني لسة عارفة دلوقتي حالاً يا ماما الأم(بإستغراب): عارفة دلوقتي حالاً؟!!!! عارفة منين يابت دةهإنتي لسة قايمة من قدام الكبورر!!!!! عفاف(ضاحكة): كبورر إيه بس يا ست الكل؟! اسمه كمبيوتر! الأم:مش مهم! المهم عرفتي ازاي ؟ ومين أصلاً العريس ده يعني جاي منين؟! عفاف:من النت يا ماما!! ظلت الأم المسكينة تنظر لإبنتها في بلاهة وهي تراجع كل ما تعرفه من كلمات ولم تجد لكلمة النت أثر بينها!!!!!!! فسألت عفاف الأم: النت ؟! ودي تبقى فين دي يا بت؟ ! عفاف: فين ازاي يا ماما؟ الأم: يعني فينها من الوايلي الي إحنا فيها؟!!!!!! تركبيلها مترو ولا أتوبيس ولا تاخديها تاكسي؟! اوعي يابت يكونوا بيروحولها بالقطر؟!!!!! عفاف(ضاحكة): إيه يا ماما الي إنتي بتقوليه دة؟! مترو إيه وقطر إيه؟! ده النت! الأم: أيوه يا بنتي عرفنا إنه الزفت!!!! بس دة موقعه في أني بلد بالضبط؟! عفاف:في كل البلاد يا ماما! الأم: انتي إتهبلتي يا بت؟ يعني إيه في كل البلاد؟ عفاف: يا ماما النت ده عبارة عن كمبيوترات كتير حوالين العالم وفيه معلومات كتير قوي عن حاجات ياما! الأم:معلومات ايه يبت انتي هو انتي هتتجوزي دايرة المعارف؟! عفاف:المهم يا ماما ان في واحد متقدملي عن طريق النت الأم: وده إتقدم ازاي يعني؟! عفاف: بعتلي إيميل!!!! الأم(في ذهول): إيميل؟! بعتلك إيميل جارنا المسيحي؟!!!!!! وإزاي يا بت تقبلي تتكلمي مع الي اسمه إيميل ده؟ وهو مين عشان الزفت بتاعك ده يبعته لينا؟!!!!! عفاف(في سرها): طب أفهمها إزاي دي بقى؟!! عفاف:يا ماما اهدي إيميل جارنا مين بس! الأم: مش انتي الي بتقولي يابت! عفاف:إيميل يعني جواب بس عالنت! الأم: برضه هتقولى عالزفت! يابنتي أنا مش فاهمة البتاع الي بتتكلمي عليه دة! عفاف:النت دة ياماما حاجة في الكمبيوتر ممكن نبعت فيها رسائل لناس بره ونستقبل منهم رسائل برضه و ده غير حاجات كتير الأم:أنا ماليش في الكلام دة! الي عاوزة أعرفه هو مين ومعاه شهادة ولا لأ؟ وأصله إيه وفصله إيه؟! عفاف:هو اسمه حاتم! وطالب في هندسة حاسبات و ... قاطعتها الأم طالب؟!!!!!! عفاف: أيوه ياماما بس في آخر سنة الأم:بصي أنا ماليش دعوة أنا هتصل بأبوكِ وهو يتصرف اتصلي بيه انتي عالموبايل وأنا أكلمه زمانه عالقهوة!!!!! وفي قهوة المعلم حسنين رن الموبايل بتاع عم حلاوة العنتبلي الجزار حلاوة العنتبلى(بصوت خشن): أيوه مين؟ الأم: أنا يا معلم العنتبلى: عاوزة إيه يا ولية؟!!! الأم: تعالى يا خويا شوف بنتك جايلها عريس من النت !!! العنتبلى: بتقولي منين ؟!!!! الأم: من النت يا حاج! العنتبلى: يعني إيه ؟! فهميني الأم: ياخويا لما أفهم أنا أبقى أفهمك! تعالى اسألها بنفسك! العنتبلي: ماشي هخلص دور الطاولة دة وآجي على طول ثم أغلق الموبايل وأخذ يكلم نفسه! نت؟! ده يطلع إيه دة كمان؟! تكونشي الولية مراتي إتهبلت؟!!!!! بس هي ناقصة هبل ؟ ماهي مهبولة من يومها! مالك يا معلم حلاوة ؟! انت بتكلم نفسك ولا إيه؟! سأله صاحبه الذي يلاعبه الطاولة هذا السؤال فانتبه المعلم حلاوة وقال العنتبلي: قولِّي يا زينهم بما إنك متعلم ومتنور ومعاك تالتة إبتدائي!!! يطلع إيه النت دة؟! طبعاً المعلم زينهم إترسم بقى وأخذ وضع فخر وعزة وهو يجيب وإنت إيش عرفك بالأشكال دي يا معلم؟! العنتبلي: أهو عرفت وخلاص زينهم: والله يا معلم حلاوة أنا سمعت مرة البت بنت أخت عمة جار خالتي! بتقول إنها شافت عالنت صور لمذابح بتحصل في العراق! العنتبلي: آآآآآآه يعني زي تليفزيون كدة يعني! زينهم: لا يا معلم مش زي التليفزيون وإنما تقدر تقول عليه جرايد بس بتتشاف عالكمبيوتر! العنتبلي: يا دين النبي! معقولة ياد الجرنال يدخل عالشاشة الصغيرة دي؟! طب بيدخلوه إزاي؟! زينهم(عامل فيها فكيك بقى!): مش فيه فتحات ورا في الشاشة يا معلم؟! أكيد بيدخلوا الجرنال منها! العنتبلي:أكيد الناس دي فاضية وموراهاش أي حاجة تعملها! زينهم: هو كدة بالضبط يا معلم! بس ليه دة كله؟! العنتبلي: أصل الولية مراتي بتقولي بنتك جايلها عريس من النت! زينهم: ألف مبروك يا معلم أكيد تقصد ان متقدملها صحفي!!!!!!!!! العنتبلى(مبسوط): بجد ياد يا زينهم؟! زينهم: طبعاً يا معلم ماهو زي ما قلتلك النت عبارة عن جرايد عالكمبيوتر يبقى قصدها ان واحد جرنالجي إتقدملها! مبروووك يا معلم! كدة ممكن تعمل دعاية للمحل بتاعك في الجرنال! وتطلع صورك انت والعجل في صفحة الحوادث! العنتبلي: طب العب يا وش السعد العب! رمى زينهم الزهر ثم صرخ دش!!! راحت عليك يا معلمي عفاف: يا ماما افهيني عشان خاطريالعريس ده لقطة ومافيش زيه في النت!أنا حبيته من كتاباته! الأم: كتاباته ؟هو مؤلف؟! عفاف: مش مؤلف قوي يعني بس بيكتب عالنت! الأم: وده بيكتب في إيه بالضبط؟ عفاف:لا لا يا ماما وده ما شاء الله مخلاش حاجة إلا لما كتب عنها الأم (بخبث): آآآآه مين يشهد للعروسة؟!! عفاف: لا والله ياماما بكلمك جد الأم(بصوت عالي): اسمعي يا بت انتي أنا لا أعرف نت ولا كتابات!أبوكِ زمانه جاي هو يتصرف معاكي عفاف(في سرها):ماهي دي المصيبة! أكمل الحلقة التانية ولا بلاااااااااااااااااش ؟؟؟؟؟؟؟؟؟؟؟؟؟!!!!!  |
| رعاة رسميين |
|
06-10-2008, 11:09 PM
| رقم المشاركة : [7 (permalink)] |
| مشرفة منتدى عالم حواء   | SaD Girl كملي في السريع بجد قصة حلوة قوي من كتر الحاجات اللذيذة اللي فيها مش عارفة أعلق عليها  الأم(في ذهول): إيميل؟! بعتلك إيميل جارنا المسيحي؟!!!!!! وإزاي يا بت تقبلي تتكلمي مع الي اسمه إيميل ده؟ وهو مين عشان الزفت بتاعك ده يبعته لينا؟!!!!! كمـــــــــــــــــــــــــــــلي بقي  |
| | |
| |
|
06-11-2008, 04:13 AM
| رقم المشاركة : [8 (permalink)] |
| مشرفة قسم الصور / خلفيات / ايقونات / شعارات | العنتبلي: يا دين النبي! معقولة ياد الجرنال يدخل عالشاشة الصغيرة دي؟! طب بيدخلوه إزاي؟! زينهم(عامل فيها فكيك بقى!): مش فيه فتحات ورا في الشاشة يا معلم؟! أكيد بيدخلوا الجرنال منها! هههههههه....شكراااا Sad منتظرين طبعا الجزء الجديد |
|
| |
|
06-13-2008, 07:55 PM
| رقم المشاركة : [9 (permalink)] |
| عضو فعال  | الحلقة الثانية دخل المعلم حلاوة العنتبلى فى هذه اللحظة مبتهجا العنتبلى: مساء الخير! الأم: يسعد مساك يا خويا! تعالى شفلك حل فى بنتك دى العنتبلى: خير يا بنتى؟ عفاف:أبدا يا بابا مش إنتوا عاوزينى أتجوز أهو جالى عريس ومع كده ماما مش عاجبها العنتبلى: أكيد مش عاجبها عشان جاهلة! سيبك منها وقوليلى إيه الحكاية؟ عفاف: فى واحد طلب إيدي عن طريق النت وقالي إنه جاد فى طلبه ومستعد ييجى فى أى وقت العنتبلى: عال عال! وإيه كمان؟! عفاف: يعنى انت مش معارض يا بابا؟ العنتبلى: وأعارض ليه يا بنتى هو أنا أيمن نور؟!!! ده حتى اتسجن أعمل زيه؟! عفاف(فى فرح):طب أرد عليه أقوله إيه؟ العنتبلى: على أيمن؟!!!!!!!!! عفاف:لا لا يا بابا أنا قصدى حاتم! العنتبلى(بصوت خشن): حاتم ميييييين؟ عفاف: العريس يا بابا! العنتبلى: آآآه مش تقولى كده من الصبح قوليلى الأول هو بيكتب فى أنهي صفحة؟! عفاف: ياااه يا بابا ده بيكتب فى صفحات كتيرة قوى! العنتبلى: عظيم! وياترى هو مشهوريعنى الناس تعرفه؟ عفاف: أكيد يا بابا دة معروف جدا في المنتديات العنتبلى: فين ياختى؟!!!! عفاف: فى المنتديات يا بابا العنتبلى: ودي تطلع إيه دي كمان؟! عفاف:دي صفحات عالنت يا بابا بتجمع أعضاء كتير وبيتكلموا فى مواضيع كتير العنتبلى: يابت سيبك من النحوى ده وكلمينى كلام أفهمه! عفاف(فى سرها):بقى ده نحوي ياعالم! عفاف: حاضر يا بابا المنتديات دى زي.. زي آه زي قعدة كده كل مجموعة واخدالها ركن وعمالين يتكلموا فى حاجة معينة وبيبقى لها شروط وقوانين معينة وكده يعنى العنتبلى: آآآه فهمت يعنى زي سوق العجول كده! عفاف(وقد فاض بها): عجول إيه بس يابا ؟!!!! بقى المنتدى زي سوق العجول؟!!!!!! العنتبلى: جرا إيه يا بت مش عاجباكي العجول يا بنت عواطف؟! مش العجول دي اللي بناكل منها عيش وربتك انتى واخواتك لغاية ما كبرتى وبقيتى عجلة زى أمك؟!!!!!! عفاف: طيب خلاص يا بابا المهم انه مشهور..مشهور قوى ! العنتبلى:طيب نيجى للمهم بقى هو عرفك منين؟! شعرت عفاف بالرعب من السؤال فأجابك بسرعة عفاف: لا يا بابا اوعى تفهمنى غلط والله ما شافنى ولا مرة حتى فى أى حتة! العنتبلى: ماطبعا يا بنتى لأنه لو كان شافك مكانشي اتقدم أصلا!!!! عفاف: وبعدين معاك بقى يا بابا! هو أنا وحشة قوي كده؟ العنتبلى(مبتسما إبتسامة صفراء): يابنت بضحك معاكى! انتى زى القمر بس عيبك الوحيد انك شبه أمك! الأم: جرالك إيه يا راجل إنت ..ما تتعدل فى الكلام أحسلّلك! العنتبلى: احم احم ...كنا بنقول إيه يا عفاف؟! عفاف: كنت بتسألنى هو عرفنى منين عموما هو عرفنى من النت واتقدملي عن طريق النت وإن شاء الله لو وافقتم هييجى يتقدملى على طول العنتبلى:وماله يا بنتى خليه ييجى عرفك من النت عرفك من السلخانة! مش فارقة المهم انه وقع على بوزه!!!! عفاف(فى سرها): ياخوفى من ألفاظكم دى الى تطفش 100عريس مش عريس واحد! العنتبلى: قوليله ييجى يوم الجمعة بعد العصر عفاف(مسرورة): حاضر يا بابا هقوله حالا ودخلت مسرعة إلى حجرتها فاستعجب المعلم حلاوة العنتبلى وسألها العنتبلى: هتعملى إيه يا بنت؟! عفاف: هقوله يا بابا العنتبلى: انتى يا بنت أخذتى التليفون عندك؟! عفاف: لا يا بابا أبدا العنتبلى: أومال هتقوليله إزاى من عندك؟ عفاف: هبعتله إيميل صرخ الأب فجأة بصوت مزعج وعالى! وإيه الى جاب الواد إيميل جارنا عندك فى الأوضة؟!!!! عفاف: يا بابا إهدى ارجوك إيميل مين بس ده الى عندى! أنا أقصدي هبعتله جواب عالنت! تذكر العنتبلى حواره مع زينهم والورق الذى يدخل من خلف الشاشة! فقال ..آه أنا بحسب! المهم بلغيه بالميعاد وقبل أن يغادر إلتفت إليها قائلا بقولك إيه يا عفاف بعد ما تكتبى الجواب حطيه بالراحة عشان الشاشة ما تنفجرشي!!!!!!! تابعته عفاف بنظرات الدهشة والحيرة وهى تقول فى نفسها أحط إيه وشاشة إيه دي الى هتنفجر؟! فى اليوم المحدد أتى العريس أنيقا مهتما بنفسه بشكل ملحوظ وذو رائحة طيبة وفى أبهى صورة واستبشر الجميع خيرا إلا أنه كما تعلمون هناك سوء تفاهم رهيب ...! فالأم تعرف أنه طالب فى كلية محترمة والأب يظنه صحفى مشهور! وعفاف مرعوبة من طريقة تعامل الوالدين مع العريس خاصة والدها كما أن المفاجأة غير المتوقعة أن العريس جاء بمفرده..! هيحصل ايه يا ترى ... انتظروووووووني |
| | |
|
| |
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| طرق مشاهدة الموضوع | |
|
|
العرض العادي
